CAGAYAN DE ORO CITY-Gibasura sa korte ang gipasaka sa kapolisan batok sa tag-iya sa security agency nga nakabase sa lungsod sa Maramag, Bukidnon.
Kini human nakit-an ni RTC Branch 8 Presiding Judge Isobel Baroso nga walay basehan ang kasong gipasaka sa Bukidnon Drug Enforcement Unit sa PNP batok kang retired Army Maj Mendrado Nailga, 55 anyos nga taga-iya sa Nailga Manpower and Security Agency sa maong lugar.
Miingon si Nailga nga unang gi-target sa search warrants sa PNP kuyog ang Special Action Force o SAF ang giingong illegal nga droga sa iyang posisyon apan walay nakuha gikan kaniya.
Kini ang hinungdan nga gipangkuha sa mga pulis ang pito ka lisensyadong armas sa iyang agency aron gamiton pagpasaka’g kasong illegal possession of firearms batok kaniya niadtong Pebrero ning tuiga.
Apan ang maong kaso ang gibasura ni Baroso tungod kay kini walay basehan hinungdan nga gawasnon na si Nailga.
