CAGAYAN DE ORO CITY-Gipangita karon ang tawo nga utok sa pagpakatag sa post sa Facebook diin nag-akusar nga gikulata sa pipila ka pulis ang suspek pagpanulis sa diha sa Brgy Macasandig ning syudad.
Kini human nag-viral ang video ug mga hulagway ni Johnbert Pagula,23 anyos nga nagpuyo sa Divine Mercy, Opol,Misamis Oriental tungod sa grabeng pagkulata kaniya dihang nadakpan.
Gibutyag ni Sr/Insp Mario Mantala Jr,commander sa Macasandig Police Station nga dili sila ang nagkulata kang Pagula apan mga residente nga nasuko batok kaniya.
Miingon si Mantala nga idangop nila sa PNP-Cybercrime Unit -10 ang hitabo aron masuta kon kinsa ang nagpaluyo sa pangalan nga Hostado Abogado nga nag-post sa social media aron lamang sila madaut sa publiko.
Samtang sukwahi sa gipatoo ni Abogado,gikontra ni Pagula nga kini gikulata’g maayo dihang nadakpan sa mga pulis sa Upper Nazareth sa syudad.
Kini human unang nakadawat sa mga batikos ang Macasandig Police Station tungod sa facebook ni Abogado diin makita si Pagula nga napuno sa mga bun-og gumikan sa pagkulata.
Apan,giklaro ni Pagula nga dili tinood nga gipatoo sa facebook post nga pulis ang mipasakit kaniya kay mismo ang mga sibilyan ang naka-kulata kaniya.
Gihimakak usab niini nga tulisan kini apan ordinaryo lamang nga habal-habal driver ug nagpuyo sa Opol,Misamis Oriental.
Samtang dili pa absuwelto apan peligro nga mangatangtang pa sa ilang pagka-pulis ang naglangkob sa Macasandig Police Station sa syudad.
Kini kon mapamatud-an sa internal investigation nga nangabuso ang maong police station kon basehan ang facebook post sa nagpatoong Hostado Abogado.
Miingon si City Police Director Sr/Supt Nelson Aganon nga gidili niini sa tanang police personnel nga mangabuso ilabina sa mga dinakpan tungod sa pasangil nga kremin.
Una nang gipasangil ni Abogado nga gikulata sa mga pulis si Johnbert Pagula,giakusahan usab nga gihimong imnanan ang barracks sa Macasandig Police Station.
