CAGAYAN DE ORO CITY-Aprobado na ni Pres. Rodrigo Duterte ang rekomendasyon sa militar nga subling lugwayan ang martial law sa Mindanao.
Gibutyag ni Executive Sec. Salvador Medialdea nga gihangyo usab ni Pres. Duterte ang kongreso nga itugot ang martial law extension.
Asoy ni Medialdea nga posibleng mopatawag ug joint session sila si Senate Pres.Vicente Sotto III ug House Speaker Gloria Macapagal Arroyo aron tuki-on ang hangyo sa presidente.
Subling gipamugos ni Medialdea nga importante ang paglugway sa batas militar aron dili maglisod ang kapolisan ug militar pagsanta sa posibleng plano sa teroristang grupo.
Samtang gisupak sa grupong Maranao Consensus ang laraw ni Pres Rodrigo Duterte nga lugwayan ang martial law sa
Mindanao.
Miingon si Maranao Consensus leader Drieza Abato Lininding nga ang himoon ni Duterte ang pagpasamot lamang
nga maipit sila nga anaa sa Lanao del Sur ug Marawi City.
Namahayag si Liniding nga unta i-konsider ni Duterte ang kalisod nga sitwasyon sa mga Maranao nga kapi’g tuig nang nag-antos nga human maguba ang dakbayan sa Marawi City gumikan sa dakong giyera sa tuig 2017.
Samtang namugos ang 4th ID,Philippine Army nga dunay igong basehan kon nganong angay ilugway ang martial law sa Mindanao sa tuig 2019.
Miingon si 4th ID spokesperson Army 1Lt Tere Ingente nga may presensiya pa sa mga terorista nga nag-unang bahad sa seguridad sa dakong bahin sa Mindanao.
Dugang ni Ingente nga nagsumikad usab sa katawhan ang rekomendasyon nga lugwayan ang martial law tungod sa nahatag nga kalig-on sa seguridad niini ilabina sa mga lugar nga anaa ang presensiya sa mga armdaong pundok sama sa nahitabo sa Marawi City ug kalungsuran sa Lanao del Sur.
