CAGAYAN DE ORO CITY-Nagtoo ang kapolisan nga inside job ang pagtulis sa Dok Alternatibo Branch diha sa Julio Pacana Street ning syudad.
Kini lusuba sa tulo ka armadong mga tulisan ang maong patigayon diin nadala ang kapin tunga sa milyon ka pesos nga salapi ug ubang mahalong kabtangan.
Miingon si Police Supt Mardi Hortillosa,tigpamaba sa Cagayan de Oro City Police Office nga imposible nga masayod ang mga tulisan sa presensiya sa dakong balor sa salapi kon walay insider sa maong patigayon.
Hinoon,nakuhaa’g CCTV camera ang mga tulisan samtang pasibat na sila sakay sa motorsiklo gikan sa Dok Alternatibo Branch nga walay nagbantay nga kaugalingong sekyu kagahapon sa hapon.
Samtang gisusi sa mga personahe sa Macabalan Police Station ang identity sa tulo ka suspek sa pagpanulis sa Dok Alternatibo diha sa dalan Julio Pacana ning syudad pinaagi sa CCTV camera.
Sumala ni Police Sr/Insp Jack Lamita, hepe sa Macabalan Police Station nga kinahanglang ilang makuha ang kopya sa CCTV aron mapadali ang pag-ila sa mga suspetsado.
Hisayran nga duha sa mga suspek ang nagsul-ob sa bonnet dihang nanulis sa maong establishimento.
Misibat ang mga suspek sakay sa XRM nga motorsiklo nga kolor itom ug puti.
