CAGAYAN DE ORO CITY-Gibasura sa milangkob sa House of Representatives Electoral Tribunal o HRET ang election protest nga gipasaka ni kanhi City Councilor Candy Darimbang batok Cagayan de Oro 1st District Rep Rolando ‘Klarex’ Uy sa tuig 2016.
Kini human walay nakit-ang lig-ong ebedensiya ang HRET aron paboran ang protesta ni Darimbang batok Uy sa isyu sa pagpanikas sa miaging piliay sa syudad.
Gibutyag sa abogado ni Uy nga si Atty Angie Carrasco Genoso nga nagmatood lamang kini nga pulos tumo-tumo ang mga pasangil sa kampo ni Darimbang batok Uy.
Samtang dili pa pinal rason moduso’g motion for reconsideration o MR ang kampo ni Darimbang sa HRET.Kini human nakurat si Darimbang sa gipakatag nga report sa kampo ni Cong Rolando ‘Klarex’ Uy nga gibasura na ang iyang election protest nga gisang-at sa HRET tuig 2016.
Alang kang Darimbang,dili tinood ang impormasyon ug gipakatag lamang kini kay nataranta na ang kampo ni Uy sa iyang election protest.
Si Uy ang nakakuha’g 57,094 votes batok Darimbang nga 51,208 boto niadtong 2016 presidential elections.
