Photo:Valencia Police Station
CAGAYAN DE ORO CITY-Natumbok na sa kapolisan ang milangkob sa rebeldeng New People’s Army o NPA nga mihimo’g pagsunog sa trak ug namutol sa dul-ag 6-mil ka punuan sa mga saging sa kompanyang Dole Philippines sa Brgy Upper Lilingayon,Valencia City,Bukidnon.
Miingon si Valencia Police Station commander Police Supt Ritchie Yandug nga anaa sa dili mominus 14 milyon pesos ang damyos nga nahimo sa mga rebelde sa maong pag-atake.
Una niini,gipara sa 15 ka NPA members ang Martignani Spray Truck nga gimaneho ni Eddie Boy Callora diin giilog ang sakyanan ayha gisunog kagahapon sa kadlawon.
Samtang idangop usab sa militar sa Commission on Human Rights o CHR-10 ang linu-og nga binuhatan sa rebeldeng New People’s Army o NPA diin gisunog ang trak ug gipangputol ang dul-ag 6-mil ka punuan sa mga saging sa Dole Philippines sa Valencia City,Bukidnon.
Miingon si 403rd IB,Philippine Army commander Col Edgardo de Leon nga sumala sa CHR-10 nga gi-koordinar usab nila ang mismong kompanya aron mahan-ay ang mga kaso ipasaka batok sa mga rebelde.
Una niini,kumbinsido si 4th ID commander Maj Gen Ronald Villanueva nga mihimo’g pagpanimalos ang mga rebelde tungod sa sunod-sunod nga kapilidihan nila sa mga engkuwentro sa Bukidnon sa miaging Disyembre 2018.
