CAGAYAN DE ORO CITY – Nahatagan sa paglaum ang usa ka 91-anyos nga lolo nga subling motin-aw ang iyahang panan-aw.
Kini human siya gisaaran sa libreng operasyon sa mga doktors nga nagserbisyo sa Bombo Medico 2019 kagahapon.
Gibutyag ni Lolo Timoteo Ababao, dugay na niya gidaladala ang halap niyang panan-aw busa wala niini palabya ang kahigayuan nga libreng makunsulta.
Sa halos duha ka oras nga biyahe gikan Naawan, Misamis Oriental, tungod na usab sa katigulangon, nawala pa si lolo Timoteo apan dako ang iyang pasalamat sa usa ka motorela driver nga nagtudlo kaniya padulong sa Capitol University diin gipahigayon ang Bombo Medico sa syudad.
Sa gihimong pag check-up sa Lolo, nasuta sa doktor nga may katarata ang iyang mata.
Dako ang kalipay niini dihang giingnan siya sa mikunsultang doktor nga hatagan siya sa libreng operasyon.
Si Lolo Timoteo ang usa lamang sa libuan ka mga tawo nga naserbisyuhan sa Bombo Radyo Philippines.
