CAGAYAN DE ORO CITY – Labihan ang pagsaka sa mga natakbuyan sa sakit nga dengue sa Northern Mindanao.
Kini ang gikumpirma ni Dr. Tristan Labitad, research epidemiology surveillance and response unit o RESDRU cluster head sa DOH 10 atol sa pakighinabi sa Bombo Radyo.
Gibutyag ni Labitad nga sukad Enero hangtud sa kasamtangang bulan anaa sa 11,220 ang kaso sa dengue sa rehiyon diin mas taas kinig 52.59% kumpara sa milabayng tuig.
Matud ni Labitad kadaghaan niini ang naggikan sa probinsya sa Bukidnon.
Subay sa ilang talaan, mas daghang mga batang lalaki ang natakbuyan sa makamatay nga sakit.
Mas gipahugtan pa nila karon ang ilang gihimong kampanya aron dili na madungagan ang ihap sa mga nagsakit.
