CAGAYAN DE ORO CITY – Samaran ang usa ka sundalo sa nahitabong engkwentro tali na sa mga rebeldeng New Peoples Army (NPA) sa may Magayad Creek, Brgy Pigsag-an ning syudad.
Gibutyag ni 403rd Brigade commander Brigadier General Edgardo de Leon nga na-engkwentro sa tropa sa 65th IB, PA ang napulo ka mga NPA nga gitoohang splinter group sa natigayon nga unang engkwentro sa Brgy Sabala Bantayao, Lumba Bayabao Lanao del Sur.
Milungtad sa 10 ka minutos ang panagsinukliay sa mga bala nga gikaangol sa usa ka sundalo. Nagtoo usab si De Leon nga adunay casualty sa panig sa mga NPA tungod sa lama sa mga dugo nga ilang nakita sa firing line.
Samtang, gihupay ni de Leon ang kabalaka sa publiko sa natigayon nga engkwentro sa militar ug mga rebeldeng New Peoples Army o NPA.
Miingon si De Leon nga layo ang posibilidad nga may mga sibilyan nga maangin tungod kay natigayon ang engkwentro sa pinakabukid nga bahin sa dakbayan.
Masaligon usab si De Leon nga dili makanaug padulong sa syudad ang mga terorista tungod kay dugay na sila nga gideklara nga persona non-grata sa mga residente sa maong barangay.
