CAGAYAN DE ORO CITY – Nawad-an na sa paglaum si City Mayor Oscar Moreno nga paboran pa sa Inter-Agency Task Force o IATF ang iyang hangyo nga ipabilin kasamtangang health protocols sa syudad.
Kini human unang gi-aprobahan ni Pres Rodrigo Duterte ang IATF recommendation nga ipaubos sa modified general community quarantine o MGCQ ang dakbayan.
Namahayag si Moreno nga nagkahulugan kini mawad-an na sa gahom ang syudad ipatuman ang kuwarantinas aron unta limitahan ang lihok sa katawhan diin gitumong pugngan matakdan sa bayrus.
Samtang dili peligro ang kahimtang sa ika-13 nga pasyente nga positibo sa coronavirus disease nga taga-Brgy Kauswagan ning syudad.
Kini human unang nadala 49 anyos nga pasyente nga nadakdan sa bayrus samtang gikan sa Cebu City ayha nasulod sa city isolation unit dinhi sa dakbayan.
Miingon si Northern Mindanao Medical Center media bureau representative Dr Bernard Rocha nga daghan ang public exposure sa pasyente ayha migawas ang sintomas sa bayrus ngadto kaniya.
