CAGAYAN DE ORO CITY – Naka-isolate karon ang construction worker kuyog ang anak babaye sa Gingoog City,Misamis Oriental.
Kini human nag-positibo sa coronavirus disease ang 30 anyos nga amahan ingon man ang iyang usa kat tuig nga anak sa swab test sa bayrus nga gihimo sa Northern Mindanao Medical Center.
Miingon si Gingoog City Mayor Eric Cañosa nga ang pasyente kuyog sa iyang asawa ug ilang anak ang gikan sa Tondo,Manila ug nakauli pabalik sa lalawigan niadtong Hunyo 11 ning tuiga.
Giklaro ni Cañosa nga negatibo sa bayrus ang 34 anyos nga kapikas sa biktima.
Miapelar ang mayor nga unta hatagan sa respeto ug dili biay-biayon tungod sa lamang sa ilang kasamtangang kahimtang.
Samtang gikompirmar ni Misamis Oriental Provincial Task Force on COVID-19 chairman Dr Jerie Calingasan nga tulo ka residente na ang positibo sa coronavirus diin naglakip sa gikan sa Libertad ug Gingoog City ning lalawigan.
Miingon si Calingasan nga maoy nadugang ang 30 anyos nga amahan ug usa ka tuig nga anak nga kabahin sa naka-avail sa ‘Balik-Probinsya’ program.
Dugang ni Calingasan nga ang mag-amahang pasyente ang gipaubos sa isolation unit sa Gingoog City sugod kagahapong adlawa.
Una usab niini,naka-confine sa Northern Mindanao Medical Center ang OFW nga taga-Libertad kinsa gikan sa Kingdom of Saudi Arabia.\
