CAGAYAN DE ORO CITY – Gisangunan ni Misamis Oriental Gov Bambi Emano ang bag-ong bise mayor nga si kanhi 1st municipal councilor Jahnus Ray Estor nga abagan ang mga programa nga haom sa interes sa katawhan nga gipatuman ni Jasaan Mayor Redentor Jardin.
Gihimo kini sa gobernador dungan sa pagpahurar ni Estor isip bag-ong bise-mayor gumikan sa makaliton nga kamatayon ni late Jasaan Vice Mayor Juan Po tungod sa pag-atake sa sakit sa kasingkasing sa miaging petsa 31 sa Disyembre 2020.
Miingon si Emano nga subo kaayo ang gidangatan sa ni Po rason nga kinasingkasing ang iyang pagpadangat sa kasub-anan kuyog ang mga empleyado’g opisyales sa kapitolyo probinsyal.
Dugtong niini,gihagit sa gobernador ang bag-ong bise mayor nga i-andam ang kaugalingon alang sa pag-atubang sa dakong kaakuhan sa pagsilbi sa ilang katawhan sa lungsod kuyog ang liderato ni Jardin.
Samtang namahayag usab si Estor nga suportahan niini ang mga programa nga nakahan-ay sa administrasyon sa munisipyo nga gitumong alang sa ikaarang sa katawhan sa lungsod.
Miapelar ang maong mga opisyal sa katawhan nga kanunay magmaampingon sa tuyo nga kapugngan ang walay hunong nga pagkuyanap sa coronavirus disease nga bahad sa matag-usa.
