CAGAYAN DE ORO CITY – Daw mihatag na’g sinyales si Misamis Oriental Gov Bambi Emano nga dili imposible alang kaniya nga modagan pagka-mayor sa 2022 elections dinhi sa dakbayan paghuman sa iyang termino sa Misamis Oriental.
Kini human gibutyag sa gobernador nga mangunsulta una siya sa iyang mga alyado sa politika kon angay dawaton ang kagustuhan sa katawhan dinhi sa dakbayan.
Apan mihangyo kini sa igong panahon nga pagtutalimbang sanglit maoy prioridad una niini ang pagsulbad sa COVID-19 ug miigo nga African Swine Fever sa pipila ka lungsod sa probinsya.
Kon mahinayon nga modagan pagka-mayor si Emano,ikatigi niini si 3rd termer Cagayan de Oro 1st District Rep Rolando ‘Klarex’ Uy kinsa nagtinguha usab sa ibakante nga puwesto ni City Mayor Oscar Moreno pag-abot sa Hunyo 30,2022.
Hisayrang si Bambi ang anak ni late Cagayan de Oro City Mayor Vicente ‘Dongkoy’ Emano kinsa kanhi mayor sa lungsod sa Tagoloan sa siyam ka tuig ug nahimo usab sa gobernador sa Misamis Oriental ayha nangalagad sa katawhan sa dakbayan sa dugay’ng panahon.
