CAGAYAN DE ORO CITY – Dili na mangilad apan motabang na lamang unta si Kag Lordan Suan nga masulbad ang naghitak nga illegal billboards diin pipila niini gipanag-iya sa iyang pamilya sa syudad.
Kini ang hagit ni SK Federation President John Michael Seno nunot sa pagbatikos ni Suan sa liderato sa konseho tungod sa gipasar nga resolusyon aron gub-on ang illegal billboard structures nga nakasupak sa ordinansa sa dakbayan.
Miingon nga angayang likayan na ni Suan ang pagmugna’g senaryo nga kutob ra sa paglipat-lipat sa katawhan.
Si Seno ang unang gipa-imbestigaran ni Suan tungod sa reklamo sa usa ka kolehiyala nga giingong gi-sexually harass niini gamit ang facebook sa miaging mga bulan.
Samtang giangkon ni Suan nga nasakitan ang iyang pamilya tungod sa personal nga pag-atake sa mayoriya sa konseho gamit ang isyu sa illegal billboard structures sa dakbayan.
Miingon si Suan nga unta nga bisan unsaon apan ma-klaro ang motibo ni Seno ug nagpagamit ang konseho aron gub-on ang iyang pagkatawo.
Hinoon,andam ang legal team sa pamilyang Suan kon ugaling mosangko sa pagkinasuhay sa korte ang maong isyu.
Nagsugod ang kainit sa billboard isyu tungod sa special report ni Seno batok Suan sa miaging regular session sa konseho.
