CAGAYAN DE ORO CITY – Nanganti si Sen Manny Pacquiao sa giingong limpyo nga pagdumala sa gobierno kon modaug sa ambisyon niini nga mahimong sunod nga presidente sa 2022 elections.
Gihimo ni Pacquiao ang mensahe dungan sa iyang pagadawat sa nominasyon sa PDP-Laban national assembly nga siya ang opisyal ipadagan pagka-presidente sa ilang paksyon.
Miingon ang boksingero nga panahon na usab nga ang mga dinaug-daug ang modaug ug mopadagan sa renda sa pangagamhanan nga gipahimudsan sa pipila ka mga opisyales nga napuno lamang sa mga saad.
Samtang lauman usab nga dunay mahimong tubag niini ang kampo sa pikas paksyon sa PDP-LABAN ni Energy Sec Alfonso Cusi o Malakanyang ning adlawa.
Gibatikos usab sa PDP-Laban Pimentel-Pacquiao wing ang liderato ni Pres Rodrigo Duterte nga giingong mi-hijack sa ilang partido aron makahupot sa katungdanan dinhi sa nasud.
Miingon si Pimentel kinsa anak ni PDP-Laban founding chairman late Sen Nene Pimentel Jr nga kini ang ensakto nga higayon aron mobarog ang mga tinood nga sakop sa partido batok sa mga misakay lamang sa panahon aron makapahimulos.
Una nang nagdeklara usab ang kampo ni Cusi si Sen Bong Go ug Duterte ang ilang opisyal nga standard bearer sa administrasyon sa sunod tuig nga eleksyon.
