CAGAYAN DE ORO CITY – Gi-konsiderar ni PNP chief Gen Dionardo Carlos nga election related violence ang sniper attack batok kang Deputy House Speaker Henry Oaminal nga miigo kanila ni 1st district congressional candidate Jason Almonte ug Lopez Jaena Mayor Michael Gutierrez kinsa nagpapili usab nga bise-gobernador sa Misamis Occidental.
Kini ang hinungdan nga gimano ni Carlos kang Police Regional Office 10 Directo Brig Gen Benjamin Acorda Jr pinaagi sa Special Investigation Task Group Oaminal-Gutierrez-Almonte ang pagsulbad nga dinalian sa kaso.
Gibutyag ni PNP spokesperson Col Roderick Alba nga gusto masuta ni Carlos gikan sa PRO-10 kon may private armed group nga naglihok sa Misamis Occidental nga kontrolado sa dagkong mga politiko.
Subay sa slow motion video ni Ozamiz City Mayor Ando Oaminal masipa nga buto ang misulod sa venue samtang mihatag sa mensahe sa fellowship christmas party message si Cong Oaminal apan wala maigo ug mibanda ang slug sa tangkugo ni Gutierrez ug Almonte sa Brgy 7,Tangub City sa miaging Disyembre 22 sa gabii.
Dugtong niini,gilawman pa sa SITG-Oaminal-Gutierrez-Almonte ang pagtukad sa labing duol nga motibo kon nganong gipa-sniper attack ang tulo ka 2022 election candidates samtang anaa sa kalipayan sa ilang exclusive christmas party sa Tangub City.
Kini bisan kon misulti na ang Camp Crame nga dili layo ang anggulo nga election related violence ang pagpusil sa snipers kang Oaminal sa maong gabii.
Gibutyag ni Misamis Occidental PNP Director Col Rolindo Suguilon nga wala lamang sa anggulo sa politika ang ilang tutok apan sa laing mga kalihukan sa maong mga kandidato.
Hinoon,walay pinusilan si Oaminal apan under observation si Gutierrez kay naigo ang ulo samtang outpatient na si Almonte.
Sa pikas bahin,gikondinar ni incumbent Misamis Occidental Provincial Gov Philip Tan ang misabwag sa kremin diin nag-resulta sa pagka-igo ni Gutierrez.
Sa Facebook post ni Tan,gipaabot niini ang iyang simpatiya ug kahingawa sa nahitabo kang Gutierrez bisan kon managlahi ang ilang gipasilungan nga mga partido sa politika.
Gibutyag ni Tan nga duyog siya sa pagkab-ot sa dinaliang hustisya rason nga giaghat ang PNP nga imbestigaro’g maayo ang sniper attack nga natigayon sa iyang dakbayan.
Si Tan ang nagpapili sa ikaduhang termino pagka-gobernador ug init niya nga karibal si Oaminal nga kaalyado niya sa politika kaniadto.
