CAGAYAN DE ORO CITY – Gi-depensa ni City Mayor Oscar Moreno ang mando ni Pres Rodrigo Duterte nga did-an kon mahimo ang paggawas-gawas pa sa mga tawo nga dili bakunado kontra COVID-19.
Miingon ang mayor nga angayang sabton sa publiko ang pinakatuyo ni Duterte kon nganong angayang limitahan ang paglakaw-lakaw sa mga walay bakuna kay peligro man sila nga dali matakdan ug ma-grabehan sa bayrus.
Gibutyag sa mayor nga dili na siya makig-debate sa aspetong legal sa maong mando apan paspasan ang pagbakuna sa katawhan.
Una nang gitahas ni Duterte sa mga kapitanes nga did-an una makagawas ang mga walay bakuna aron dili makadugang sa ihap sa mga magpositibo sa bayrus nga makapuno sa kalisod paghaw-as sa nasud sa pandemya.
