CAGAYAN DE ORO CITY – Gilahugay o gipang-destino na sa lain-laing mga syudad ug probinsya ang city election officers ingon man ang provincial election supervisors sa Commission on Elections sa Northern Mindanao.
Miingon si Comelec 10 regional atty Gina Sabio nga maoy bag-ong election officer sa Cagayan de Oro si Atty Roel Valledor samtang iyang gipulihan nga si Atty Ramil Acol ang gi-destino na sa Ozamiz City.
Nabalhin usab si Atty Carlito Ravelo gikan sa Misamis Oriental padulong sa Misamis Occidental.Nabalhin usab sa Lanao del Norte ang gihulipan ni Ravelo nga si Atty Melber Alinas ug napadulong sa Bukidnon si Atty Joseph Hamilton Cuevas nga gikan sa maong probinsya.
Samtang maoy bag-ong election supervisor sa Comelec-Misamis Oriental si Atty Alile Ramirez kinsa gihulipan usab ni Att
y Palmer Palamine gikan sa iyang assignment didto sa Camiguin.
Dugang ni Sabio kinsa election officer usab sa Oroquieta City nga maoy bag-ong Comelec head sa Iligan City si Atty Joel Dexter Nagtalon.
Samtang gilikayan sa Comelec nga ma-impluwensahan sa dagkong mga politiko ang ilang mga opisyal sa taliabot nga Mayo 9 nga piliay.
Gibutyag ni Sabio nga kini ang rason nga gipangbalhin sila sa lain-laing mga lugar aron kalikayan ang ‘familiarity’ tali kanila ug sa mga kandidato.
Namahayag ang opisyal nga dili na kini bag-o alang sa ahensiya kay matag-paangat sa eleksyon nila gihimo ang re-shuffling.
Dumduman nga mas una nabalhin sa region 12 si Comelec 10 Director Atty Reynato Magbutay ug maoy mipuli usab kaniya si Comelec -Caraga Director Atty Francisco Pobe alang sa Northern Mindanao.
Samtang nakataas alerto Cagayan de Oro City Police Office o COCPO alayon sa mga mosulod-gawas nga mga kandidato gikan sa nasyonal.
Kini alayon sa nagsugod na nga kampanya sa natl candidates partikular sa pagka-presidente ug bise-presidente nga posisyon.
Gibutyag ni COCPO Director Col Aaron Mandia nga may nakahan-ay na sila nga ‘template’ niini subay usab sa kamanduan sa Kampo Krame.
Hisayrang anaa sa 21 ka lugar dinhi sa rehiyon ang gisugyot ni PRO 10 Director Brig Gen Benjamin Acorda Jr nga ipaubos sa election hot spot apan wala pa’y pag-aprobar niini gikan sa Comelec.
