CAGAYAN DE ORO CITY – Direkta nang makatugpa ang international flights sa mga eroplano gikan sa nagkadaiyang bahin sa kalibutan diha sa Laguindingan Airport sa Misamis Oriental.
Kini sa higayon nga mahingpit nang ma-upgrade ngadto sa international airport ang maong tugpahanan sa dili madugay.
Miingon si Misamis Oriental 2nd District Rep Bambi Emano nga nag-unang tuyo sa iyang gipasar nga balaodnon nga mahimo na kining Laguindingan International Airport aron sayon na lang ang pagpanguli sa taga-Northern Mindanao gikan sa ilang mga biyahe abroad.
Gawas nga mapugngan ang air traffic sa Manila International Airport,dako usab kaayo’g ikaugmad sa ekonomiya ug turismo kon international airport na ang Laguindingan nga kanhi Lumbia Airport nga nakabase dinhi sa syudad.
Hisayrang gisubhan ang maong tugpahanan tuig 2006 ubos ni kanhi Pres Gloria Macapagal Arroyo ug nagsugod ang operasyon sa 2013 sa panahon na ni late Pres. Benigno Simeon ‘Noynoy’ Aquino III.
