CAGAYAN DE ORO CITY – Miani sa nagkadaiyang reaksyon ang Facebook post ni committee on social services chairperson Kag. Girlie Balaba nga mitawag sa atensyon ni adhoc committee chairman Kag James Judith nga atimanon ingon man hataga’g ayuda ang city council staff niini nga nasikop sa PNP tungod sa ilegal nga droga.
Kini human nagtoo ang pipila ka social media netizens nga panimalos ang gihimo ni Balaba ug pag-divert sa isyu kay subli gi-imbestigaran sa gidala nga komitiba ni Judith ang ECQ special ayuda cash distribution alang sa katawhan sa syudad sa miaging tuig.
Samtang gikompirmar ni Balaba nga siya ang nag-post apan gitugyan niya sa katawhan hukom sa mahimong kapalaran ni Judith ug Guangco.
Siya miingon nga wala niya diktahi si Judith o Guangco nga mo-resign tungod sa maong iskandalo apan gihatag niya sa katawhan ang paghukom sa maong sitwasyon.
Samtang dili lang mabalaka si Balaba kay walay makabalda sa imbestigasyon kabahin sa kontrobersyal nga ECQ special ayuda nga pinondohan ni kanhi Pres Rodrigo Duterte sa balor 767 milyones pesos alang sa katawhan.
Miingon si Judith nga klaro nga pag-divert sa isyu sa ayuda ang gihimong Facebook post ni Balaba kabahin sa pagka-sikop ni Guangco apan dili kini makapahunong sa imbestigasyon.
Dugang ni Judith nga mopadala’g sulat-hangyo kang City Vice Mayor Jocelyn ‘Bebot’ Rodriguez nga gilayon nang paphaon sa trabaho si Guangco aron dili mahataga’g negatibong imahen ang dungog sa city council sa dakbayan.
Si Balaba ang ilado nga dunay direktang kontak kang Duterte rason nga nakahataga’g pabor ang pag-download sa 767 milyones nga special ayuda funds diin sobra 200-mil ka tawo sa dakbayan ang naka-benepisyo sa miaging tuig 2021.
Hisayrang gi-ayudahan ni Duterte ang katawhan kay napaubos sa lockdown ang dakbayan tungod sa taas nga kaso sa COVID-19 sa milabay’ng tuig.
