CAGAYAN DE ORO CITY – Gipalig-on pa ni City Mayor Klarex Uy ang kapas ug abilidad sa disaster response team batok sa mga dagkong kalamidad o trahedya nga moigo sa dinhi sa dakbayan.
Kini human gipadayon sa mayor ang unang nasugdan nga tinguha ni kanhi City Mayor Oscar Moreno nga magbaton sa kaugalingong opisina ang CDRRMD sa syudad.
Nangulo si Uy sa pagsubo sa tukuron nga operation emergency center niini nga apil sa 5-storey CDRRMD Emergency Disaster Coordinating Center diha sa Brgy Carmen ning syudad.
Dugang sa mayor nga dugay na niya gipangandoy nga maghupot sa kaugalingong building ang CDRRMD aron mas maka-pokus sa ilang mga trabaho ilabina panahon sa emerhensya.
Samtang gusto ni Office of the Civil Defense 10 regional director Antonio Sugarol nga mahimong template ang gisugdan nga katukuran sa Cagayan de Oro nga kaugalingong 5-storey building sa CDRRMD sa Brgy Carmen.
Kini human dayga ni Sugarol ang paghatag prioridad sa mayor sa kaluwasan sa katawhan kontra trahedya o kalamdidad nga hayan moagi sa dakbayan.
Miingon ang opisyal nga kini ang labing una nga higayon nga dunay local govt unit nga nagtukod sa kaugalingong CDDRMD Emergency Disaster Coordinating Center sa rehiyon.
