CAGAYAN DE ORO CITY – Pag-usik-usik sa salapi sa gobierno ang pagbaton sa dakong delegasyon sa Pilipinas ang pagtambong ni Pres Bongbong Marcos sa World Economic Forum sa Davos,Switzerland.
Kini maoy tipik sa pagsaway ni kanhi IBP-Misamis Oriental chapter president Atty Eddie Cuaresma kay alang kaniya nagpakita kini nga wala pilia’g ayo sa presidente ang labing importante nga personalidad aron moapil sa katiguman.
Siya miingon nga nalabwan pa sa Pilipinas ang 19 ka milangkob sa delegasyon sa Amerika nga unta labing gamhanan kini nga ekonomiya sa kalibutan.
Una niini,naglaraw pa gani ang mga aktibistang sakop sa Kongreso nga imbestigaran ang kadaghan sa miuban kang Marcos sa maong katiguman.
Samtang gi-depensa ni Citizens Watch for Good Governance 10 convernor Atty Antonio Soriano ang 70-man delegation ni Marcos pagtambong sa economic forum sa Switzerland.
Miingon si Soriano nga angay lamang ipaila ni Marcos ang iyang kaugalingon isip bag-ong presidente aron mas kumbinsido ang pagdani sa mga dagkong mga negosyante nga mamuhunan dinhi sa nasud.
Siya miingon nga naka-pokus sa pagpalig-on sa ekonomiya ang Marcos Jr administration rason nga gibaligya’g maayo niini ang business potential nga makita dinhi sa nasud.
