CAGAYAN DE ORO CITY – Gibulgar karon ni City Mayor Rolando ‘Klarex’ Uy nga natukod ang duha ka district hospitals sa Brgy Lumbia ug Brgy Tablon ning syudad nga walay building permits.
Kini ang impormasyon nakaabot sa mayor gikan sa city engineer’s office ning dakbayan.
Miingon si Uy mayor nga natukod ang district hospital sa Tablon nga wala gani road right of way ug peligro usab nga masudlan sa tubig-baha.
Namahayag si Uy nga dili pa usab mapuslan ang ospital sa Lumbia kay wala pa hatagi’g permiso sa Dept of Health gumikan sa kadako sa kakulangon niini.
Gawas niini,nasuta usab sa mayor nga anaa sa 33 ka gipangtukod nga public school buildings nga wala gihapo’y permiso nga nahatag ang dakbayan.
Partikular gitumbok ni Uy ang publikong tunghaan sa Brgy Bugo nga giingong sobra kahuyang ang pundasyon ug peligro alang sa mga tinun-an ug mga magtutudlo.
Hisayrang ang maong duha ka district hospitals ang natukod sa panahon nga sipa kaayo ang pandemya sa COVID-19 sa dakbayan ubos sa adminsitrasyon ni kanhi City Mayor Oscar Moreno.
