CAGAYAN DE ORO CITY – Gikompirmar sa Police Regional Office 10 nga dunay mga dagkong politiko nga gihatagan nila sa security escorts dinhi sa rehiyon.
Kini tungod sa seryoso nga mga bahad sa kinabuhi nga nadawatan sa maong mga politiko sa rehiyon.
Miingon si PRO 10 spokesperson Police Maj. Joan Navarro nga hinoon,dili tanang LGU officials ang dunay bahad apan alerto ang lower units sa PNP kabahin niini.
Gihimo sa PRO 10 ang lakang human naka-survive si Lanao del Sur Gov. Mamintal ‘Bombit’ Adiong Jr sa pag-ambush sa iyang convoy apan patay ang iyang upat ka escort sa lungsod sa Maguing sa miaging Pebrero ning tuiga.
Samtang daw giagi’g komedya ni Misamis Oriental Gov. Peter Unabia ang iyang isyu sa seguridad dinhi sa lalawigan.
Kini human miingon si Unabia nga mas kahadlukan pa ang iyang dagway itandi sa mga tawo nga nagtinguha sa kinabuhi niini.
Miingon ang gobernador nga nasubo kini sa gidangatan sa iyang mga kaubang gobernador nga nahimong biktima sa mga pagpangatake sama sa Lanao del Sur ug Negros Oriental.
Apan unang gisaysay sa kapitolyo probinsyal nga dunay pagpahugot sa seguridad sa mga opisyal sa lalawigan.
