CAGAYAN DE ORO CITY – Nabalaka ang pipila ka mga dagkong pinili nga mga opisyal dinhi sa rehiyon nunot sa pag-atake sa armadong kalalakihan sa mismong pinuy-anan ni late Gov. Roel Degamo sa Pamplona,Negros Oriental.
Kini human wala magsilbi ang security escorts sa gobernador sa dihang siya gipatay ug laing walo ang nadamay sa maong hitabo sa miaging semana.
Miingon si Cong. Bambi Emano sa segundo distrito sa Misamis Oriental nga unta mapadali ang pagkontrolar sa katibuk-ang sitwasyon aron wala na’y mosunod nga opisyal sama sa gidangata ni Degamo.
Giuyunan usab sa kongresista ang dinaliang mando ni Pres Bongbong Marcos nga pagbungkag sa tanang private armed groups nga binuhi sa pipila ka politiko nga dakong peligro sa seguridad sa nasud.
Samtang wala magkulang ang Police Regional Office 10 paghatag seguridad sa pipila ka dagkong elected officials nga nakabase dinhi sa rehiyon.
Maoy gitumbok ni Police Regional Office 10 spokesperson Police Maj. Joann Navarro ang mga mayores sa mga syudad,kalungsuran ug gobernadores sa mga probinsya sa Northern Mindanao.
Siya miingon nga mismo ang Kampo Krame ang naghatag pagtugot sa deployment sa ilang pinili nga police organic members aron mohatag seguridad sa govt officials sa rehiyon.
Una nang gikompirmar sa Kampo Alagar nga dunay pipila ka elected govt officials ang nag-atubang sa seryosong bahad sa ilang mga kinabuhi.
Samtang gisugdan na sa Camp Alagar ang pagsusi sa mga lugar nga dunay init nga bangi sa politika sa miaging brgy ug sk elections dinhi sa rehiyon.
Kini ang tubag ni Navarro nunot sa kabalaka sa kamarabaha nga hayan mo-resulta sa init nga engkuwentro sa politika ang umaabot nga October brgy ug sk elections sa nasud.
Miingon si Navarro nga kamulo na ang pagtuki niiini sa ilang kadagkuan aron makahimo’g mga lakang nga makahatag proteskyon sa mga kandidato ug mga botante sa eleksyon.
Hisayrang sulod sa rehiyon,anaa sa 2-mil 022 ang mga brgy nga mohimo’g eleksyon ning tuiga.
