CAGAYAN DE ORO CITY – Gidugangan ang kahugot sa seguridad nga gipatuman sa kapolisan palibot sa dakbayan.Kini human isulti ni City Mayor Rolando ‘Klarex’ Uy nga adunay nakaabot nga intelligence report kang City Director Police Col. Aaron Mandia nga dunay nangutahan nga pipila ka tawo kon asa siya nagpuyo dinhi sa syudad.
Miingon ang mayor nga dili siya supak nga bisan hasol alang kaniya nga pun-an ang iyang security escorts ilabina nga sunod-sunod nga ang pag-atake sa local elected officials sama sa nahitabo kang ambush survivor Lanao del Sur Gov. Mamintal Adiong Jr ug Negros Oriental Gov. Roel Degamo sa Visayas.
Samtang gipahugtan sa Police Regional Office 10 ang border controls sa Northern Mindanao aron dili makasulod ang posibleng mga tawo nga tahas mohimo’g dagkong kremin dinhi sa syudad.
Kini isip lakang sa Camp Alagar nga dili mabutang sa peligro ang mga kinabuhi sa local govt unit officials ilabina dinhi sa syudad ug lalawigan.
Gibutyag ni PRO 10 spokesperson Police Maj Joann Navarro nga nangunay pagsusi si Police Brig Gen Lawrence Coop aron masiguro nga dili usab mahitabo kon unsa man ang ambush incident sa Lanao del Sur ug pagpangmasaker didto sa Negros Oriental.
Miingon si Navarro nga nagkatigom ug may mga lakang na nga gihimo ang intelligence community sa PNP ug AFP batok sa mga tawo o pundok nga mohadla sa kahusay’g kalinaw sa rehiyon.
