CAGAYAN DE ORO CITY -Dili lang housing ug actual occupants inventory apan angayang apilon pagsuta sa konseho ang mga kayutaan nga napalit sa administrasyon ni kanhi City Mayor Oscar Moreno ning syudad.
Kini ang hagit ni City Mayor Rolando ‘Klarex’ Uy aron masuta kon tinud-anay nga ensakto ang nagpuyo nagkadaiyang relocation sites nga daghang kanila mga biktima sa paglampurnas sa baha ug pagdahili sa yuta sa paghapak sa bagyong Sendong sa dakbayan.
Miingon ang mayor nga dako kini’g tahod sa konseho ug unta dili limitahan sa imbentaryo lamang sa mga kabalayan apan ilakip ang mga yuta nga napalit sa city govt kon tinud-anay nga matukuran sa mga balay o sulod sa relocation programs sa dakbayan.
Samtang angayang mahatagan sa igong higayon nga makatubag ug maka-depensa usab sa mga kaugalingon kadtong mga tawo nga molugwa nga dunay kalambigitan sa giingong anomaliya sa city social housing program nga gipadagan sa CHUDD sa dakbayan.
Kini ang apelar ni committee on cooperatives chairman Konsehala Imee Moreno kabahin sa himoong imbestigasyon sa konseho kabahin sa maong isyu.
Miingon ang konsehala kinsa anak-babaye ni kanhi City Mayor Oscar Moreno nga angayang patas ang himoong pakisusi ug dili lang kutob sa trial by publicity sa konseho.
