CAGAYAN DE ORO CITY – Gilaraw ni majority member Kag. Roger Abaday nga moduso’g resolusyon maghatag pagtugot kang minority floor leader Kag. James Judith nga ipadayon ang paggukod sa mga tawo nga gitumbok sa iyang imbestigasyon nga dunay posibleng tulubagon sa giiingong anomaliya sa sobra 700 milyones nga special ECQ ayuda sa dakbayan.
Kini human nabasa ni Abaday ang unod sa special report ni Judith diin daw napingis siya sa findings rason nga angayang palawman pa ang imbestigasyon pinaagi sa pagduso’g kaso sa Ombudsman.
Kini ang rason nga gihagit ni Abaday si Judith nga dili magtinalawan apan tiwason kon unsa man ang iyang nasugdan sa maong isyu.
Samtang gidawat sa walay pagduha-duha ni Judith ang hangyo ni Abaday nga padayunon ang pagpangita sa giingong nawaldas nga bana-banang 50 milyones pesos gikan sa special ECQ ayuda sa dakbayan.
Miingon si Judith nga wala pa sukad sa iyang kinabuhi nga mibalibad kini sa hagit kon nakataya ang interes sa katawhan.
Una nang nasulat sa special report ni Judith nga angayang manubag sila si kanhi City Mayor Oscar Moreno,former city administrator Teddy Subagaa ug iyang CSWD officer kaniadto nga si Michael Fabello.
Samtang gibabagan ni social services committee chairman Konsehala Girlie Balaba ang proposed resolution ni Abaday nga magtugot kang Judith nga ipadayon ang pagtaral sa mga personalidad nga nalambigit sa giingong anomaliya sa special ECQ ayuda.
Miingon si Balaba nga gire-kognisar nila ang findings sa report ni Judith apan angayang dili magamit ang konseho kon gustuhon niini nga isaka sa Ombudsman ang maong isyu.
Siya miingon nga nakahukom na ang iyang komitiba nga naumol ang adhoc committee ni Judith nga mismo ang DILG ug DSWD 10 ang angayang mohimo’g dugang imbestigasyon kabahin sa isyu.
Una niini,gikompirmar ni City Vice Mayor Jocelyn ‘Bebot’ Rodriguez nga dili una tukion ang resolusyon nga tuyo ipasar ni Abaday sa plenaryo apan ibalik sa komitiba ni Balaba rason nga 13 ka konsehal ang mipabor ug upat lang ang misupak.
