CAGAYAN DE ORO CITY – Gitumbok sa PNP ilabina nga responsable usab sa kamatayon sa lima ka PDEA agents ang grupo nga misulay pagpatay kang Lanao del Sur Gov. Mamintal Adiong Jr sa Brgy Bato-Bato,Maguing sa miaging Pebrero ning tuiga.
Kini subay sa impormasyon nga nahuptan ni Police Regional Office 10 Director Brig Gen Lawrence Coop nunot sa pagkasikop sa tulo sa mga sakop sa Gandawali criminal group samtang nagtagu-tago sa Kalilangan,Bukidnon pipila ka adlaw gikan sa pagka-ambush kang Adiong.
Miingon si Coop nga aktibong miembro sa grupo si Palawan Macalbo kinsa dunay daghang warrant of arrests sa kasong murder nga naglakip sa PDEA agent ambush sa Lanao del Sur sa miaging Oktubre 2018.
Gihimo sa heneral ang kompirmasyon nunot sa pagduso na’g kasong illegal possession of firearms ug explosives batok Palawan,Amirodin Mandoc ug Nagac Baratomo sa piskalya sa Malaybalay City kagahapong adlawa.
