CAGAYAN DE ORO CITY – Tinguha sa kampo ni Konsehal James Judith nga makaduso na sila’g mga kaso batok kang kanhi City Mayor Oscar Moreno ug laing duha ka kauban sa Ombudsman sa sunod nga bulan ning tuiga.
Kini human angkona ni Judith nga main complainant siya sa iyang gipamugos nga findings nga dunay discrepancies sa cash distribution sa katawhan sa sobra 700 milyones pesos nga special ECQ ayuda sa dakbayan.
Miingon ang konsehal nga anaa sa 3-mil ka residente ang giingong wala kadawat ug pipila kanila ang kuhaa’g sinumpaan nga pahayag aron magamit sa ipasakang kasong pagsupak sa graft and corruption practices act ug hayan plunder.
Samtang gitambagan ni kanhi City Mayor Oscar Moreno si Konsehal James Judith nga ayuhon paghan-ay ug angayang dunay lig-o nga unod ang gipasiatab niini nga pagduso’g mga kaso batok kaniya sa Ombudsman.
Kini tungod aron dili maulawan ug mahimong kataw-anan kon pag-abot sa Ombudsman igo lang ibasura ang iyang ipasakang mga kaso.
Miingon ang kanhi mayor nga dili na unta niya angay tumpangan ang klase sa pagkatawo ni Judith apan kon makasalagma’g ambot sa Ombudsman ang ilang giingong reklamo,iya na lang kining respetaran.
