CAGAYAN DE ORO CITY – Gihukasan sa mayoriya isip majority leader sa konseho ang ilang beterano nga kaalyado nga si Kag Ian Mark Nacaya sa sesyon kagahapon sa hapon.
Kini human nakadawat ang Bombo Radyo sa impormasyon nga nawad-an na’g kumpiyansa ug pagsalig ang mayoriya sa liderato ni Nacaya nga tipik sa modumala sa sesyon rason nga si Kag.Edgar Cabanlas ang ilang gipuli sa nabakanteng katungdanan.
Apan isip pag-depensa,namugos si Cabanlas nga ‘term sharing’ lang ang gihimo sa konseho kabahin nila ni Nacaya.
Siya miingon nga normal lamang kini nga proseso sulod sa matag-konseho palibot sa nasud.
Magsilbing presiding officer pro tempore sa konseho si Kag. Romeo Calizo samtang asst majority leader ni Cabanlas si Konshala Girlie Balaba.
Samtang gihinaut ni City Vice Mayor Jocelyn ‘Bebot’ Rodriguez nga huptan ni Cabanlas ang diwa sa pagsilbing patas sa mayoriya ug minoriya sa konseho sa dakbayan.
Kini samtang giila sa konseho ang kabag-uhan pinaagi sa pag-ilis kang Nacaya ug pagsaka sa mga katungdanan sa laing duha nila ka kauban.
Miingon ang bise-mayor nga unta sama sa kakugi ug pagsilbing patas ni Nacaya,mabati gihapon sa konseho ang kahanas pagdumala ni Cabanlas sailang mga sesyon sa umaabot nga mga adlaw.
Dugtong niini,gipasalig ni Cabanlas nga magsilbing alagad ug dili agalon sulod sa konseho sa dakbayan.
Kini ang tubag ni Cabanlas samtang gipaboran sa mayoriya ug bisan sa minoriya ang paghupot niya sa maong katungdanan sa konseho.
Siya miingon nga ampingan niya ang dignidad ug dungog sa konseho susama sa ubang mga konsehal nga naghupot sa maong katungdanan sa milabay’ng mga konseho.
Gipaniguro niini nga isip abogado,masunod ang tanang mga patakaran sulod sa konseho.
