CAGAYAN DE ORO CITY – Gitawag ni kanhi City Mayor Oscar Moreno nga dakong ‘iskandalo’ sa liderato ni City Mayor Rolando Uy ang lima ka bulan nga kalangan sa suhulan nga dawaton sa job order workers diha sa city hall.
Kini human unang nagpaabot sa sulat-reklamo ang wala nagpaila nga JO worker ngadto kang Pres Bongbong Marcos pinaagi sa hotline 8 8 8 8 aron masusi ang luya nga proseso sa paglugwa sa ilang mga suhulan dinhi sa syudad.
Miingon si Moreno nga naghinobra ra usab kini nga kalangan ug angay nga dili kini pasagdan sa pamunuan sa kasamtangang naglingkod nga mayor.
Samtang giilayong gi-aksyonan ni Uy ang nabulgar nga reklamo sa job order workers nga dugay nang wala mahatagi sa ilang mga suhulan samtang nagtrabaho sa dakbayan.
Gitahasan sa mayor ang city legal office sa pagsulbad sa maong suliran sa mga trabahante.
Gani,gibutyag ni
Antonio Resma Jr,representante gikan sa City Legal Office nga may ilusad sila nga ‘payroll management feedback system sa city hall sa mismong adlawa.
Siya miingon nga tuyo niini nga masiguro sa mayor nga magbaton sa hapsay payroll processing flow alang sa mga empleyado sa city hall.
Siya miingon nga ipasabot kini pag-ayo sa CLO ngadto sa mga empleyado karong adlawa.
