CAGAYAN DE ORO CITY – Pakyas nga masulbad sa administrasyon ni City Mayor Klarex Uy ang suliran sa kremin,trapiko ug kapobrehon sa unang tuig sa iyang pagdumala sa dakbayan.
Kini ang gipalanog nga kaugalingong panglantaw ni Wilson Amad kinsa advocate sa Kampana Mass Media Advocate kabahin sa nahatag nga performance sa mayor sa dakbayan.
Miingon si Amad nga walay nakit-an nga kabag-uhan sa dagan sa trapiko apan nagsamot pa hinoon ingon man ang kreminalidad sa dakbayan.
Hinoon,usa ka tuig pa ang pangatungdanan sa mayor aron ipalambo ang iyang mga programa ug serbisyo sa dakbayan.Samtang gihataga’g grado nga singko ni Capitol University Research Extension Office Director Imelda Pagtulun-an ang usa ka tuig nga trabaho isip mayor ni Uy sa syudad.
Miingon si Pagtulun-an nga dunay gamay nga direksyon nga iyang nakita sa pagdumala ni Mayor Uy sa dakbayan.
Apan wala siya mouyon sa pagpanghulip sa mayor sa pipila ka department heads nga dunay ensaktong kahibalo pagpadagan sa gidumala nila nga mga buhatan.
Maoy gitumbok ni Pagtulun-an ang pagsilbing floating ni kanhi city budget officer Atty. Percy Salazar nga gibalhin sa city agriculture operations office.
Dugtong niini,gitambagan ni kanhi City Mayor Oscar Moreno si Uy nga wad-on ang pagsilbing ‘insecure’ samtang ipadagan ang mga kalihukan sa dakbayan.
Kini maoy nasabtan sa kanhi mayor kon nganong kanunay isulti ni Uy ang paglahugay sa mga ulo sa departamento sa city hall.
Miingon si Moreno nga sulod sa usa ka tuig nga pagdumala sa mayor sa city hall,nahiaguman usab ang pagkahugno sa burukrasiya nga dunay dako’g epekto sa dakbayan.
