CAGAYAN DE ORO CITY – Gusto pa-imbestigaran sa konseho kon nganong wala mahuman ang 37 ka mga proyekto ubos sa administrasyon ni kanhi City Mayor Oscar Moreno.
Kini ang gihimong unod sa special report ni Kag. Edgar Cabanlas sa sesyon.
Miingon si Cabanlas nga subay sa Commission on Audit report dunay tulo ka proyekto nga nahatagan na’g pondo apan wala sukad masugdi sa miaging katuigan.
Anaa sa 211 milyones pesos ang balor sa maong mga proyekto nga gi-kuwestiyon sa findings sa COA.
Samtang gitahasan ni Kag. Edgar Cabanlas ang komitiba ni Kag. John Michael Seno ug Kag. Alam Lim nga imbestigaran ang maong COA findings sa kanhi administrasyon.
Miingon si Cabanlas nga angayang ayuhon nila ang pag-imbestigar aron mahatagan sa kaangayan ang katawhan sa dakbayan kon may binuang sa maong mga pagpatuman sa mga proyekto.
Siya miingon nga dili makatugot ang konseho nga mawaldas ang salapi nga iya sa katawhan sa dakbayan.
Samtang gilayong mohimo’g pagdungog ang komitiba ni Seno kabahin sa COA findings nga nagtumbok sa mga proyekto sa miaging administrasyon.
Miingon si Seno nga gitakdang magtigom ang duha ka komitiba sa petsa 26 sa Hulyo ning tuiga.
Miingon si Seno nga tinguhaon nila nga makab-ot ang kagustuhan sa mayoriya sa konseho kabahi sa maong isyu.
Sa pikas bahin,gusto ni Kag .James Judith nga dunay matukod nga adhoc committee kabahin sa COA findings.
Siya miingon nga angyang madiretso ang pagtubag sa isyu kaysa daghan pa ang agian niini.Siya miingon nga angayang dili palabyon ang maong hisgutanan kon pananglitan nakataya ang panalapi sa katawhan.
Una usab niini,namahayag si Moreno nga obligasyon na sa misunod kaniya nga ang pagtibawas sa mga proyekto nga iyang nabiyaan paghupas sa iyang termino.
