CAGAYAN DE ORO CITY – Wala kahadluki apan gikalipay ug gipasamatan ni kanhi City Mayor Oscar Moreno ang himoong imbestigasyon sa konseho kabahin sa iyang 37 ka proyekto nga gi-kuwestiyon sa Commission on Audit o COA ning syudad.
Kini human unang gibulgar ni Kag.Edgar Cabanlas nga sa 37 ka proyekto,adunay tulo niini nga nahatagan na sa pondo apan giingong walay nakita nga katumanan.
Miingon si Moreno nga kon nakasabot lang unta si City Mayor Rolando ‘Klarex’ Uy sa gitawag nga principle of continuity,wala na’y himoong imbestigasyon sa konseho kay mismo na siya ang mopasabot sa COA kabahin niini.
Gi-kuwestiyon usab sa kanhi mayor ang kapasidad ni SK Federation President Kag. John Michael Seno nga gitahasan nga mo-imbestigar nga walay kasinatian sa mga trabaho isip enhenyero.
Samtang gipalihok na ni minority leader Kag. James Judith ang iyang kaugalingong giporma nga team aron pangitaon ang giingon sa Commission on Audit nga 37 ka infra projects ubos sa Moreno administratio nga wala mahuman ug dakong kuwestiyonabli ning syudad.
Kini bisan kon dili miembro si Judith sa duha ka komitiba nga gitahasan sa mayoriya sa konseho nga mohimo’g imbestigasyon kalabot niini.
Miingon si Judith nga obligasyon usab niini nga dunay direktang kasayuran ilabina nga dili tiaw nga pondo sa salapi sa katawhan ang naka-alokar sa maong mga proyekto.
Una nang gisugyot ni Judith nga motukod sa laing adhoc committee alang niini apan gibalibaran una sa mayoriya sa konseho.
Sa pikas bahin,gusto ni SK Federation President Kag. John Michael Seno nga masampulan nga madeklara nga ‘persona non grata’ ang mga kontraktor nga natahasan pagtrabaho sa 37 ka proyekto nga gigastuhan sa salapi sa dakbayan.
Kini ang hangyo ni Seno sa mayoriya sa konseho aron dili basta-bastahon ang city govt pag-abot sa mga katukuran sa mga proyekto nga pinondohan sa katawhan.
Miingon ang batan-ong opisyal nga hangtod nga walay masampulan,magpabilin usab nga daw tuntuhon ang city hall pinaagi sa mga pagsubmitar sa mga bakak nga project accomplishments.
Hisayrang gihatagan sa mayoriya sa konseho ang grupo ni Seno nga tapuson ang imbestigasyon sulod sa tulo lamang ka semana.
