CAGAYAN DE ORO CITY – Giuyunan sa mga sakop sa konseho nga ilhon nga persona non grata na ang kontrobersyal nga drag queen nag si Pura Luka Vega dinhi sa syudad.
Kini human mihimo’g special repor si Kag. Ian Mark Nacaya diin nag-aghat sa konseho nga ipasar ang resolusyon nga dili dawaton si Vega kon makabisita sa dakbayan.
Miingon si Nacaya nga nagsumikad ang maong lakang tungod sa iyang pagdagmal sa pagtoong Katolika diin gisundog niini ang imahen sa Black Nazarene ug gikanta ang re-mix sa Amahan Namo sa kauluhan sa miaging bulan.
Ang syudad ang labing ulahi nga nagsalikway kang Vega tungod sa iyang pagbinastos sa pagtoong Katoliko tungod lang sa gipamugos niini nga ‘art content’ diha sa social media.
Samtang mismo si City Vice Mayor Jocelyn ‘Bebot’ Rodriguez ang mibati’g kabastos usab dihang nakit-an niini ang tipik sa video clip sa drag performance Pura Luka Vega sa special report ni Nacaya sa konseho.
Miingon si Rodriguez nga angay lamang dili palabyon ang maong taras ni Vega nga klaro nga pagbastos ug pagbugal-bugal sa pagtoong Katoliko.
Siya miingon nga nahago pag-ayo ang mga ginikanan sa pagtudlo sa maayong gawi sa kabataan ug mga pag-ampo apan simple lang nga giguba ni Vega tungod sa iyang katarungan nga kabahin sa art content diha sa social media.
