CAGAYAN DE ORO CITY – Gipasalig ni Senate President Migz Zubiri nga tabangan si City Mayor Rolando ‘Klarex’ Uy sa pagpangita’g pondo aron mabalhin ug makatakod na ang city govt sa bag-ong city hall sa mas luag nga espasyo sa syudad.
Kini maoy giyagyag ni Zubiri atol sa iyang pagtugyan sa 53 ka bag-ong disaster pick-up vehicles sa city govt sa Pueblo de Oro ning syudad kagahapon sa buntag.
Miingon ang senador nga dayag lamang nga motabang kini sa tinguha ni Uy kay dinhi na siya nagpuyo sa dakbayan sa taas-taas nga panahon.
Samtang dako ang posibilidad nga magka-alyansa sa ilang politika si City Mayor Rolando ‘Klarex’ Uy ug Senate President Migz Zubiri sa umaabot nga mga piliay o eleksyon dinhi sa dakbayan.
Kini ang pasumbingay sa mayor nunot sa iyang pagtubag sa gisulti ni Zubiri nga andam siya nga mohatag sa dugang pondo aron mahataga’g katumanan ang pagbalhin sa bag-ong tukuron nga city hall sa syudad.
Miingon si Uy nga anugon kon mo-retiro na sa politika si Zubiri nga dunay kaliwat sa Bukidnon paghuman sa iyang termino isip senador sa sunod nga mga piliay sa nasud.
