CAGAYAN DE ORO CITY – Gikasuhan sa kompanyang Metro Waste Solid Management Corporation sa Office of the Ombudsman si City Mayor Rolando ‘Klarex’ Uy ug ubang city officials sa dakbayan.
Subay sa nasayran ni kanhi City Mayor Oscar Moreno nga nagsumikad ang reklamo kang Jerry Ching kinsa presidente sa Metro Waste tungod sa pipila ka diskripanse sa gihimong bidding ug awarding sa kontrata sa bag-ong kompanya nga maoy mangulekta sa mga basura sa dakbayan.
Nalatid sa reklamo nga maoy gihatagan sa syudad sa award ang Jomara Construction bisan kon suspendido ang Philgeps accredation niini ug gi-disqualify ang Metro Waste bisan kon sila ang pinakaubos sa bidding.
Apil sa mga gikasuhan ang mga miembro sa Bids and Awards Committee ug technical working group nga naglakip kang CLENRO manager Engr Cuenca.
Nadawat sa Ombudsman ang reklamo batok city officials sa syudad sa miaging Agosto 11 ning tuiga.
Sa pagkutlo ning balita,wala pa’y gilugwa nga tubag ang mayor ug bisan ang ubang city hall officials kabahin sa maong isyu.
