CAGAYAN DE ORO CITY – Ilusad sa Commission on Elections -Cagayan de Oro ang unity walk ingon man covenant signing alang sa mismong mga kandidato sa Kiosko Kagawasan,Divisoria ning syudad ugma sa buntag.
Kini sa tuyo nga ipadumdom ug matisok sa mga kandidato kuyog sa ilang political supporters ang pagpahigayon sa malinawon ug hapsay nga brgy ug sk elections sa Oktubre 30 ning tuiga.
Miingon si 1st District City Election Officer Atty. Joel Dexter Nagtalon nga magsugod ang unity walk sa Rodelsa Circle padulong sa Plaza Divisoria alas 5:00 ang takna sa buntag ugmang adlawa.
Nagbalik-balik sa pagpadumdom ang Comelec nga likayan ang premature campaigning sa mga kandidato sa bisan unsa nga paagi aron dili ma-disqualify pagdagan ug walay atubanon nga kasong kriminal kabahin sa eleksyon.
Samtang gi-relib na sa Police Regional Office 10 ang sobra 300 pipila ka commission ug non-commision police personnel ug gipang-destino sa lain nga mga lugar dinhi sa rehiyon.
Kini human dunay sakop nila sa pamilya nga midagan sa nagkadaiyang posisyon sa umaabot brgy ug sk elections sa Oktubre ning tuiga.
Miingon si PRO 10 spokesperson Police Maj. Joann Navarro nga nag-unang tuyo sa re-assignments sa maong mga pulis nga dili mogamit sa ilang impluwensiya aron makabintaha ang mga kabanay niini sa piliay sa brgy.
Dumduman nga istrikto ang kapolisan sa ilang palisya nga daw walay dapigan nga mga kandidato sa matag-lusad sa eleksyon sa nasud.
Sa pikas bahin,nangabalhog na sa nagkadaiyang prisohan ang dul-an 20 ka indibidwal nga nakasupak sa gipatuman nga election ‘gun’ ban’ sa Comelec kuyog sa kapolisan ug militar dinhi sa Northern Mindanao region.
Kini sukad gisugdan pagtuman ang maong mando Agosto 28 ug nagbutang sa tibuok rehiyon sa kontrol sa Comelec pagsulod sa election period.
Miingon si Navarro nga nag-una nga tumong sa paggukod batok sa mga ilegal nga armas nga dili magamit sa paghimo’g kremin samtang nagkaduol ang kampanya sa piliay sa brgy.
Kini ang rason nga hugot ang paglusad sa random road checkpoints palibot sa Amihang Mindanao.
