CAGAYAN DE ORO CITY – Tukion sa sunod regular session sa konseho ang nakalusot na sa executive budget hearing nga gipangayong 11.2 bilyones pesos nga tinuig nga pondo ni City Mayor Rolando ‘Klarex’ Uy ning syudad.
Kini human anaa sa 14 ka konsehal ang miuyon sa proposed 2024 city budget nga naglakip sa 2.7 bilyones pesos nga pondo nga utangon sa bangko kay gamiton pagpalit sa yuta ug tukuran sa city hall annex sa syudad.
Miingon ang presiding officer nga si City Vice Mayor Jocelyn ‘Bebot’ Rodriguez nga anaa lamang sa 7 ngadto 8 porsiento ang pagsaka sa gipangayong pondo sa mayor itandi sa sobra 6 bilyones pesos sa miaging tuig.
Sa gihimo usab nga botasyon sa pagtuki sa pondo,gibarugan sa upat ka sakop sa minoriya sa konseho ang ilang pagsupak sa nakasukip nga bank loan nga dugay nga gituki sa milabay’ng mga sesyon sa konseho sa dakbayan.
Gihinaut ni Rodriguez nga unta makab-ot sa city govt ang ambisyon niini nga 11.2 bilyones pesos nga kinitaan sunod tuig aron mahatagan sa katumanan ang mga saad nga serbisyo ug programa sa dakbayan.
Una niini,gipasalamatan ni Uy ang konseho tungod sa pag-aprobar na sa iyang gipangayo nga pondo nga gamiton sa sunod tuig.
Samtang ipalig-on pa ni Uy ang ‘brgy empowerment program’ alang sa kabarangayan sa dakbayan.
Saad kini ni Uy nunot sa pagpanumpa sa dul-an 50 ka napili nga kapitanes sa miaging brgy uy sk elections sa tourism hall ning syudad kagahapon sa hapon.
Miingon ang mayor nga lakip usab sa iyang ipalig-on ang kapas ug abilidad sa mga batan-ong mga napili ubos sa sangguniang kabataan.
Nag-komedya pa kini nga kon unsay ihatag ni ABC federation president Kag. Alam Lim ang dawaton lang sa mga kapitan aron sigurado nga mapili kini sa ikatulong higayon nga mo-representar sa hawanan sa konseho sa dakbayan.
