CAGAYAN DE ORO CITY – Dili kumbinsido si kanhi City Mayor Oscar Moreno nga makab-ot sa kasamtangang administrasyon ang 11.2 bilyones pesos nga pondo aron gamiton sa sunod tuig nga pag-alagad sa katawhan sa dakbayan.
Alang kang Moreno dili balanse ang pagkaporma sa maong giambisyon nga pondo nga una nang gihangyo ni City Mayor Rolando ‘Klarex’ Uy nga gilayong gi-aprobahan usab sa budget executive hearing sa konseho ning semanaha lamang.
Siya miingon nga maayo na lang gani kon makakuha’g 6 bilyones pesos nga kinitaan ang syudad igo pagtak-op sa tuig 2024.
Ang 2.7 bilyones pesos sa maong pondo ang gamiton sa pagpalit sa yuta kay tukuran sa city hall annex sa syudad.
Samtang wala na’y mga tawo nga motoo sa mga isulti ni kanhi City Mayor Oscar Moreno kon manghilabot lamang kini sa mga kalihukan ug mga programa sa syudad.
Kini ang tubag ni City Mayor Rolando ‘Klarex’ Uy kabahin sa komentaryo ni Moreno sa sobra kadako nga city govt budget nga gamiton alang sa sunod tuig sa dakbayan.
Miingon si Uy nga samtang madunggan sa katawhan ang tingog sa kanhi mayor,madumduman usab nila ang ilang kalisod nga wala sila hatagi’g ayuda sa panahon nga naigo sa pandemya ang dakbayan.
Hinoon,nagpasalamat si Uy kang City Vice Mayor Jocelyn ‘Bebot’ Rodriguez ug mayoriya sa konseho nga gi-suportahan nila ang hangyo niini nga pondo sa sunod tuig.
