CAGAYAN DE ORO CITY – Kasub-anan pa ug dakong kakurat pa gihapon ang nagpatigbabaw sa katawhan sa Tablon nunot sa kalit nga kamatayon sa kanhi nila punong brgy nga si Billy Kid Auza.
Kini human wala damha ang kamatayon sa kanhi brgy kapitan samtang padulong unta sa Misamis Occidental aron kuhaon ang hinigugma niini ug hanyagan sa tanyag sa kaminyoon.
Saysay ni Tablon Punong Brgy Romeo Bacarro nga nakatagpilaw ang biktima sa pagmaneho sa pribadong sakyanan samtang nagsubay sa Brangay Napo,Linamon,Lanao del Norte rason nga mibangga sa road gutter ug nahulod sila sa ubos.
Patay diha-diha ang biktima samtang samaron usab ang kauban niini nga pag-umangkon nunot sa hitabo.
Nunot niini,gitakdang ihaya usab sa brgy ang patay’ng lawas sa biktima gikan sa pribadong punerarya diha sa Brgy Lumbia sa dakbayan.
Dumduman nga nagsilbi nga kapitan si Auza sulod sa usa ka termino kay nagsilbi man nga konsehal si Bacarro kay nahutdan sa termino.
Apan sa bag-uhay nga 2023 brgy ug sk elections,nagka-bangga ang duruha sa susamang posisyon diin midaug si Bacarro.
