CAGAYAN DE ORO CITY – Angayang hatagan sa katawhan sa laing tsansa ang pag-usab sa batakang balaod pinaagi sa paggamit sa People’s Initiative o PI nga gisugdan na’g trabaho sa pipila ka mga opisyal sa brgy ning syudad.
Kini ang depensa ni kanhi Macasandig Brgy Kag. Nixon Baban kinsa tipik sa pabor sa signature campaign aron makuha ang 8 milyones nga pirma sa botante nga gamiton sa pagtuki sa chacha ilabina sa mga probisyon sa ekonomiya niini.
Miingon si Baban nga daghag higayon nga napakyas ang paggamit sa constitutional convention ug constituent assembly,rason nga angay usab sulayan ang people’s initative alang sa pagpalig-on sa economic provisions sa nasud.
Samtang gihagit ni CWGG 10 convenor Atty Antonio Soriano 340 ka magbabalaod nga gilangkuban sa mga kongresista ug mga senador nga buhata’g implementeng law ang anti-political dynasty law nga nalatid sa 1987 Philippine Constitution.
Kini kon tinud-anay nga kaugmaon sa nasud ang gihingusgan sa mga magbabalaod ug dili ang ilang naghinobra nga interes sa kaugalingon.
Miingon si Soriano nga kanunay ibalik-balik sa pro-charter change lawmakers nga dili na haom ang economic provisions sa nasud apan sa matag-foreign trip ni Pres Bongbong Marcos,wala kini sukad moingon nga angayang mag-charter change na kay maglisod pagsulod ang langyaw’ng mga negosyante dinhi sa nasud.
Dugtong usab niini,dili angayang basulon ang unod sa konstitusyon apan mismo ang mga opisyal nga nanglikod sa poder sulod sa kagamhanang-Pilipinhon.
Kini ang kusganong pagsupak sa yanong magbubuhis nga si Bro.Wilson Amad kabahin sa gipakatap nga signature campaign sa kabarangayan nga gitumong gamiton sa pag-usab sa batakang balaod gamit ang PI.
Miingon si Amad nga halos gisunod sa Pilipinas ang porma ug unod sa konstitusyon sa Amerika apan dakong katingad-an kay pabiling kabus ang katawhang Pilipinhon kay naghinobra ang kinawata ug abusar sa gahom.
Kini ang rason nga dako siya nga supak sa gipatoo sa mga kongresista nga angay kini sa ikaayo sa nasud nga pag-usab sa konstitusyon.
Hisayrang subay sa expose ni Sen. Imee Marcos,anaa sa 20 milyones pesos ang saad sa liderato sa kamarabaha nga ihatag sa matag-kongresista gamit ang pondo sa DOLE,DSWD ug DoH kon makatigom sa gipangayo nga pirma gikan sa katawhan.
