CAGAYAN DE ORO CITY – Walay angay itago ang Cagayan de Oro Water District o COWD rason nga gihatagan nila sa mga kopya sa kontrata ang city govt nunot sa serbisyong panubig sa dakbayan.
Kini human supak si City Mayor Rolando ‘Klarex’ Uy nga dunay ipatuman nga water rate increase ang COWD aron makalahutay sa ilang operasyon sugod ning tuiga.
Miingon si COWD General Manager Engr Antonio Young nga andam sila mohatag katin-awan kon ipatawag sila sa konseho nga maoy nangayo sa COWD-COBI multi-million water supply contracts.
Samtang gisaway ni kanhi City Mayor Oscar Moreno ang gihimong pagpangayo’g kopya sa konseho sa mga kopya sa kontrata sa commercial water supply tali sa COWD ug Metro Pacific Water Consortium rason namugna ang Cagayan de Oro Bulk Water Incorporated o COBI sa syudad.
Miingon ang kanhi mayor nga bunga lang sa naghinobrang intriga ang gihimong lakang sa konseho.Siya miingon nga dili angay pugngan ang COWD sa gipangayo nga usbaw sa bayrunon kay magamit gihapon nila kini sa pagserbisyo sa katawhan.
Una niini,gipanguluhan ni Kag. Edgar Cabanlas ang gitukod nga adhoc committee kay gusto nila imbestigaran ang unod sa mga kontrata sa panubig sa COWD-MetroPac-COBI transactions.
