CAGAYAN DE ORO CITY – Dili tugtan ni Cagayan de Oro 1st District Cong Lordan Suan nga magkagidlay lamang ang katawhan sa unang distrito nunot sa isyu sa panubig sa dakbayan.
Kini ang rason nga mihimo usab siya’g lakang pagsulbad sa suliran sa panubig.
Gihimo ni Suan ang katin-awan nunot sa pag-kuwestiyon ni City Mayor Rolando Uy kon nganong nanginlabot kini sa suliran sa panubig sa dakbayan.
Dumduman nga wala nagustuhi ni Uy ang pag-entra ni Suan sa eksena kay namiligro nga hayan e-takeover sa Local Water Utilities Administration ang pagdumala sa Cagayan de Oro Water District o COWD.
Miingon si Uy nga dili trahaho sa kongresista ang maong suliran rason nga angay wala kini magsamuk-samok.
Giklaro sa mayor nga dili usab siya uyon nga ipaubos sa LWUA control ang COWD kay lisod nang mapugngan kon dunay ipatuman nga pagtubo sa bayrunon sa tubig sa umaabot panahon.
