CAGAYAN DE ORO CITY – ‘Dili mana dapat maoy panghuna-huna sa usa ka opisyal.Wow,asa ba ang iyang hustong panghuna-huna’.
Kini ang sumbalik-batikos ni kanhi City Mayor Oscar Moreno sa pagsaway sa alyado ni City Mayor Rolando ‘Klarex’ Uy nga si City Council Majority Leader Kag. Edgar Cabanlas sa isyu sa pipila ka dagkong proyekyo sa syudad nga nabiyaan ug wala pa nahuman.
Miingon si Moreno nga dili sila managsama ni Cabanlas sa pangutok nga kon duol nang mahuman ang termino,wala na usa’y buhaton nga pagsilbi sa katawhan pinaagi sa pagtukod sa dugang mga proyekto.
Nahimong sentro sa atake ni Cabanlas ang duha ka ospital sa Brgy Tablon ug Brgy Lumbia nga dungan-dungan gitukod sa panahon ni Moreno nga lisod matubag ang panginahanglan tungod sa kadako sa panginahanglan.
Gitambagan ni Moreno si Cabanlas nga angayang mag-rebyo sa unod sa Universal Health Care diin nagsumikad ang ideya nga matukod ang dugang duha ka ospital aron dili na mapuno’g maayo ang city hospital pag-abot sa panahon.
Una nang giingnan ni Cabanlas si Moreno nga kung ensakto pa’g utok,wala niya dungana ang katukuran sa ospital sa Lumbia ug Tablon.
Si Moreno ug Cabanlas ang kanhi magka-alyado sa politika sa dugay’ng panahon batok sa mga Emano ubos sa Padayon Pilipino Party apan pagsulod sa administrasyon ni Klarex, nagka-aslom kini ug misubay sila sa tagsa-tagsa na ka mga alyansa alang sa 2025 midterm elections.
Si Oca nagtinguha pagputol sa ikaduhang termino si Klarex pagka-mayor samtang si Cabanlas subli nagpapili sa pagka-konsehal sa distrito dos ning syudad.
