CAGAYAN DE ORO CITY – Mi-apelar ang Commission on Elections o Comelec sa mga kandidato nga dili binastuson apan hataga’g taas nga pag-respeto ang pagbalaan sa mga mahal nga adlaw sunod semana.
Gihimo ni Comelec 10 regional director Atty Renato Magbutay ang mensahe nunot sa kusganong pagdili sa mga kandidato nga makahimo’g pagpangampanya sa mga lugar diin dagsaon sa mga deboto alayon sa pag-obserbar sa Huwebes ug Biyernes Santo ning tuiga.
Gibutyag ni Magbutay nga dili unta angay pa pahinumduman ang mga kandidato nga e-reserba ang maong duha ka adlaw sa semana santa nga dili pangahason nga mohimo’g pagpangampanya kay dako kining kasupakan sa Omnibus Election Code.
Nagpasabot nga kadtong masapon ug mapamatud-an nga mitrampas sa maong kalagdaan ang manubag sa ilang buhatan ug hayan pahamtangan sa diskuwalipikasyon.
Siya miingon nga dili lang magmahay kadtong mga kandidato nga mangahas sa paglapas sa balaod niini kay ipahamtang nila ang tukmang silot.
Giaghat na lang ni Magbutay ang mga kandidato nga sama sa kadaghanan,angayang mamalandong sila sa ingon nga mokunsad kanila ang ilang gipangsaad sa covenant signing sa miaging semana.
Hisayrang bisan ang pagpanghatag sa freebies sama sa tubig,snacks,tubig ug energy drinks nga gikan sa grupo sa mga kandidato ang dakong gidili rason giaghat nga likayan na lang ang pagsupak aron walay atubangon nga disqualification case.
