CAGAYAN DE ORO CITY – Political gimik lamang ni Pres Bongbong Marcos ang paghatag katumanan sa iyang saad nga makapalit na’g balik ang katawhan sa 20 pesos kada-kilo sa bugas nga sugdan sa tulo ka rehiyon sa Visayas sa sunod semana.
Kini human unang gikompirmar ni DA Secretary Francisco Laurel Jr nga mahatagan na sa katumanan ang sobra duha ka tuig nga saad ni Marcos nga pirmi gisingil sa katawhan.
Miingon si Atty. Antonio Soriano,convenor sa Citizens Watch for Good Goverance 10 nga katingad-an nga gipili nga pilot area ang Visayas diin naglakip sa balwarte ni House Speaker Martin Romualdez sa Region 8.
Siya miingon nga ang gihimo sa administrasyon ni Marcos ang dayag nga porma sa ayuda bugti sa pagbotar sa katawhan sa mga alyado niini sa politika.
Hisayrang sa paggawas sa maong balita, gilayong gibatikos ni Vice Pres Sara Duterte ang pinili lang nga pagpatuman nga saad ni Marcos sa tulo ka dagkong rehiyon sa Kabisayaan.
