Walay awtoridad ang Department of the Interior and Local Government (DILG) sa pag-usisa o pagkwestiyon sa mga reklamo sa pipila ka residente nga wala malakip sa pay-out sa social services programs sa Department of Social Welfare and Development (DSWD), sama sa “Ayuda sa Kapos ang Kita Program,” o AKAP ug “Assistance to Individuals in Crisis Situation,”o AICS.
Sa pakighinabi sa Bombo Radyo kang DILG – Northern Mindanao Director Edward Bhagwani, iyang gibutyag nga kung lehitimo ug tukma ang proseso sa pagpili sa mga benepisyaryo — gikan sa barangay level ug gi-implementar na kini, dili na makasulod ang DILG aron mususi kung kinsa ang naa sa listahan.
Kay anaa sa DSWD ang gahum sa pagsala sa mga benepisyaryo ug pagdesisyon kung kinsa ang angay makadawat sa ayuda, subay sa listahan nga gisumiter sa mga barangay units.
Una niini, nakadawat sa reklamo ang Bombo Radyo nga adunay pabor-pabor sa pagpili sa mga benepisyaryo sa AKAP ug AICS.
