CAGAYAN DE ORO CITY – Pagka-priso sa unom ka tuig ug dili na makakupot sa bisan unsa nga katungdanan sulod sa gobierno ang madutlan sa mga kandidato nga mapamatud-ang sad-an sa pagpamalit sa mga boto sa katawhan sa eleksyon sa nasud.
Kini ang subli pagpasidaan sa Police Regional Office 10 sa gilusad nga Kontra Bigay campaign sa Commission on Elections o Comelec aron likayan sa mga kandidato ug mga botante ang ‘vote-buying ug vote-selling.
Miingon si PRO 10 spokesperson Major Joann Navarro nga bug-at ang silot ngadto sa mga makit-an sa korte nga sad-an sa pagsupak sa Omnibus Election Code Resolution No. 11104 rason nga dili angay ibalewala sa kadaghanan.
Gihimo ni Navarro isip pagtubag sa panaghap nga walay aksyong gihimo ang PRO 10 batok sa gipamugos sa mikatag nga video clip nga adunay vote buying ug vote selling sa usa ka lugar sa Brgy Carmen ning syudad sa miaging gabii.
Siya miingon nga sensiro gisunod sa PNP ang mga kasuguan sa Comelec isip usa sa mga deputized government agencies kabahin sa May 12 elections.
Miingon si Navarro nga daghan pa ang mahimong isilot sa balaod kung ang usa ka tawo nakahimo’g paglabas sa maong balaod.
Kini naglakip usab sa pagkabilanggo sa mismong mga botante kung mobaligya sa ilang mga kaugalingon ngadto sa mga kandidato.
Hisayrang nagsilbing dakong hagit sa PRO 10 ang obligadong pagpatuman sa mga kasuguan sa Comelec’s Committee on Kontra-Bigay nga adunay madakpan,makasuhan ug masampolan nga madutlan sa balaod aron mabilanggo sa pinakaunang higayon sa kasaysayan sa piliay sa nasud.
